Davao City – Maglisod ang Davao City Anti-Scam Unit og konektar kun may kalabotan ba sa napasirado nga mga investment schemes ang sunod-sunod nga nahitabong kamatay kun krimen sa dakbayan sa Tagum karong panahona.
Matud ni Anti-Scam Unit Head Simplicio Sagarino, may dakung posibilidad nga bangi ang motibo sa pagpusil-patay sa mga biktima, busa lisod i-relate gilayon sa failed investment schemes ang serye sa mga panghitabo ilabi na sa Tagum City.
Unang gikataho nga usa sa mga biktima sa pagpamusil nahibal-an nga usaka agent sa Ever Arm Marketing nga karon sirado na.
Una niini, adunay ninggula nga mga taho nga malisud na nga mahagilap ang mga nagpaluyo niini ug dili na usab manubag ang mga Team Managers ug ang mga agents sa mga tawo nga nagpaabot nga mabalik ang ilang capital.
Gidasig ni Sagarino ang katawhan ilabi na ang mga taga-Dabaw nga mitagana og kapital sa mga iskema sa Tagum City ug kasikbit nga lugar sa rehiyon nga dili magpadala sa gibati aron kalikayan ang paghimo og salaud batok sa mga personahe sa mga investment schemes nga makonsiderang miilad kanila.
Giawhag hinoon sa opisyal ang mga nabiktima nga mas maayong moduol sa SEC, NBI, CIDG or sa PNP aron pormal nga pasang-atan og reklamo kadtong mga tawong nagpaluyo sa mga iskema aron sa ingon, ila pang mabawi ang ilang kwarta nga gi-invest diha sa maong mga money-making ventures.
RadyoMaN Joel Viray
