TACLOBAN CITY – Gindig-unan han Dept. of Agriculture Region 8 nga waray mahihinabo nga krisis hiton bugas ha rehiyon.
Nabaraka ngan napa-usa man gud an mga kosumidor kun kayano waray na ginbabaligya nga NFA rice ha merkado.
Ha interview han RMN kan Francisco Rosaroso, Dept. of Agriculture Region 8 Information Officer, mayada 96% rice sufficiency an Sinirangan Bisayas sanglit diri daw makakasiring nga may krisis hin bugas dinhi ha aton.
“Iton aton sufficiency index dinhi ha Eastern Visayas is 96%, puru-parehas hini hiton national… so diri kita makakasiring nga mayada rice looming crisis, amu nga gindidig-unan gud namon nga waray mahihinabo nga rice crisis.”
Dugang han opisyal, mayada 100% rice sufficiency an probinsya han Biliran ngan Southern Leyte.
Diri naman daw nagpapabaya an buhatan kay twice a week iton ira monitoring han bugas ha merkado.
