Davao City – Agi sa pagpakita sa pagka-sister city plano ibida sa pagatukuran nga parke sa Nanning City sa China ang kultura sa mga Dabawenyo.
Kini ang gibutyag ni Davao City Vice Mayor Bernard Al-ag nga plano imuntar ang Davao City Park sa giingong itukod nga Nanning City sa China nga muarangkada karong tuiga.
Giingon ni Al-ag, ang nindot nga relasyon sa Davao City ug Nanning City maoy nahimong dalan aron tukuron ang Davao City Park isip pagpakita sa paghinigalaay sa duha ka siyudad.
Ang pagtukod sa parke giingong pundohan mismo sa Nanning City apan ang disinyo maga-gikan sa City Engineer’s Office ug sa Davao City Planning Development Office.
Kun hingpit mahuman ang proyekto karong tuiga imbitahan ang mga opisyal sa siyudad aron mulangkob sa pagahimoon unya nga inagurasyon sa Davao City Park.
Nasayran nga pipila sa mga kultura makita unya sa pagatukuron nga parke mao ang durian ug Philippine eagle.
Kahinumduman, ang Davao City ug Nanning City nahimong sister cities human gipirmahan ni President Rodrigo Duterte ang usa ka agreement dihang mayor pa kini sa dakbayan.
RadyoMaN Joel Viray
