Roxas City, Capiz – Naglab-ot na subong sa kabug-osan nga 684 ang kumpirmado nga kaso sang COVID-19 infection sa syudad sang Roxas base sa update nga ginpaguha sang COVID-19 Task Force.
Ini matapos nga duha(2) ka mga new confirmed cases ang nabalhag sang City Health Office(CHO).
Nahibaluan nga ang amu nga mga nagpositibo ang lunsay mga close contacts sang nauna nga mga nagpositibo.
Ang mga ini ang ginalakipan sang 37 – anyos nga babayi, pumoluyo sang Purok I, Barangay Dayao kag Health Worker sa pribado nga ospital. Close contact sang nauna nga nagpositibo.
Positibo man sa COVID-19 ang 67 – anyos nga babayi, pumoluyo sang Pinaypayan, Lanot, Roxas City. Ini nga pasyenti ang na- admit subong sa Roxas Memorial Provincial Hospital(RMPH).
Sa subong, 17 na ang mga ginakabig nga active cases sa Roxas City, 629 ang recovered cases samtang 38 ang nagkalamatay bangud sa COVID-19.
