Padayon karon nga ginabulong sa Iloilo Doctor’s Hospital ang isa ka lalaki matapos maigo sang buno sang iya naka-away kaina sang hapon sa barangay Dagami, Maasin, Iloilo.
Ginkilala ang biktima nga si Henry Maderable, 47 anyos sang amo man nga lugar nga may igo sa tiyan tuga sang pagbuno.
Ang suspek ginkilala naman kay Jobert Hervas, legal ang pang-edaron.
Suno kay Police Sr. Inspector Oswald Gatuslao, hepe sang Maasin PNP nga magkaupod nga naga-iunum-inum ang suspek kag biktima bilang pagsaulog sang Paskuwa sang magbaisay ang mga ini bangud sa pataas-taas sugid sang istorya.
Bangud sini, pareho nga nagpauli sa ila balay ang duha kag sa ila pagbalik, nagsumalangay ang mga ini.
Bitbit ni Henry Maderable ang binangon samtang kutsilyo naman ang dala ni Jobert Hervas.
Ginhandus ni Maderabke sang binangon si Hervas apang nakalikaw ini kag ginbalusan ini buno ni Hervas kag naigo gid sa tiyan.
Gindala una sa Ramon Tabiana District Hospital sa banwa sang Cabatuan si Maderable apang gin-refer ini sa Iloilo Doctor’s Hospital.
Samtang nagpalagyo naman ang suspek kag padayon nga ginatinguhaan nga madakpan sang kapulisan.
