Davao City – Personal nga gisundo ni Overseas Workers Welfare Administration (OWWA-XI) Director Eduardo Bellido sa Ninoy Aquino International Airport ang 150 ka OFWs nga naka-uli sa nasod gikan sa Kuwait kagahapong adlawa.
Sumala ni Bellido nga sagad sa mga OFW nga mi-avail sa repatriation ug naka-uli gahapon sakay sa Philippine Airlines mao ang mga undocumented ug overstaying sa Kuwait.
Tungod sa gipahamtang nga total deployment ban, liboan ka mga OFWs gikan Kuwait nameligro mawad-an og panginabuhi nunot sa walay kasigurohan sa trabaho dinhi sa nasod.
Nagsumikad ang total ban human gikasuko ni Pres. Rodrigo Duterte ang brutal nga kamatayon ni Joanna Demafelis ug sa ubang mga domestic helpers ug rampant nga abuso sa mga agalon.
Apan segun ni Bellido, dili angay mabalaka ang mga OFW gikan Kuwait tungod adunay intervention program ang kagamhanan alang kanila.
Ang kagamhanan nag-andam og P5,000 hangtod P20,000 nga cash assistance ug livelihood training program diin pwede na sila makatikad og panginabuhian sama sa negosyo.
Subay ani, gitin-aw sa director nga dili lang China ang gikunsidera ni Duterte nga balhinan sa mga OFWs nga nawad-an og trabaho sa Kuwait apan lakip ang ubang mga nasod sama sa Japan nga nagkina-hanglan og caregivers.
Ug magdepende na kini tanan sa mga OFWs kung asa ang ilang pillion- kun dawaton ba ang programa sa gobyerno o bin ba kaha manarbaho sa China ug sa ubang nasud sa kalibutan.
Wala man giklaro ni Bellido kung hingpit na ba ang total deployment ban sa Kuwait apan ang labing klaro sa iyang pamahayag mao ang dakung posibilidad nga makabalik sa mao nga nasud ang mga OFWs pag-abot sa panahon.
Kung ugaling magkatakdo na pareho ang Pilipinas ug Kuwait nga mulagda og bilateral agreement nga manalipod sa mga Pilipino gikan sa pangabuso sa mga employers hayan ang mga OFWs makabalik na sa mao nga nasod.
RadyoMaN Joel Viray
