Davao City – Gumikan sa kontrobersiya sa mga investment companies nga nangbutho karon dinhi sa rehiyon onse, lakip nga gibati ug tumang kabalaka mao ang Davao City Chamber of Commerce and Industries Incorporated (DCCCI).
Gibutyag ni Chamber President Arthur Milan nga daghan na sila’g nabati labot sa mga tawo nga mi-asenso ug nadato na tungod sa mga investment schemes nga natawo sa rehiyon partikular sa Tagum City.
Segun ni Milan, ang pagdato sa mga tawo aduna kiniy positibo nga resulta sa ekonomiya sa usa ka lugar kay nagpasabot nga may kapasidad na ang katawhan sa pagpalit sa gusto nilang paliton ug uban pa.
Giangkon ni Milan nga curious siya niining mga iskema nga nanggula karon busa naninguha kini nga masuta ang gihimong pamaagi sa mga iskema kung nganong mangadato man ang ilang mga investors.
Apan luyo niining kaayohan nga napahimuslan sa mga tawo, gibati usab og dili ti-aw’ng kabalaka ang pangulo sa hut-ong sa mga negosyante sa ihatud nga epekto niini sa mga kumpanya kay hayan mokunhod ang work force pag-abot sa panahon.
Alang kang Milan,mas maayo gyod nga regulated sa gobyerno ang mga investment schemes aron dili sila makapaturatoy sa dakung interest nga gusto nilang ibalik sa mga investors kay basin wala na’y ganahan manarbaho nga mosangpot sa negatibong epekto sa production.
RadyoMaN Joel Viray
