La Libertad, ZDN-Mipaabot sa iyang dakong pagpasalamat si Mayor Romeo Mejias ngadto sa mga kawani ug opisyales sa kagamhanang lokal sa La Libertad, mga kapitan ug katawhan sa kalampusan sa pagsaulog sa ika-60 ka tuig nga kasumaran sa pagkahimusgo sa maong lungsod.
Dugang pa sa last-termer mayor nga ang panaghiusa ug pagsuporta sa usa ka semana nga kalihukan maoy nakapahimo niini nga nagmalampuson, sadya ug mabulukon.
Samtang mokabat sa P112 mil ang nahimong abot sa usa ka semana usab nga Agro-Trade and Industrial Fair nga gisalmutan sa tanang 13 ka barangay sa maong lungsod.
Lakip sa gipang-display sa matag barangay mao ang produktong agrikultura sama sa lagutmon, utanon, prutas, mga kahayupan ug uban pa nga maoy produkto sa matag barangay.
Ang Barangay New Argao maoy nakakuha sa unang dapit sa Agro-Trade Booth Contest kinsa nakakuha sa P2,000; ikaduhang dapit nakuha sa Barangay San Jose sa premyo nga P1,500 ug ag third place nakuha sa Barangay Singaran sa premyo nga P1,000.
Ug ang 10 ka barangay nga misalmut nakakuha usab kini ug tag P600 isip consolation prizes.
Kahibaloan nga ang lungsod sa La Libertad mao usay nakakuha sa second place atul sa Agri-Tourism Booth Contest sa Saulog 2019 nga gipahigayon kaniadtong Hunyo 1-6 sa Dipolog Boulevard subay sa pagsaulog sa kasumaran sa pagkahimugso sa Zamboanga del Norte.
Samtang sa gipahigayon usab nga Search for Miss La Libertad Tourism 2019 kaniadtong Agosto 30, nakuha ni April Joy Rasonable Agura sa New Carcar ang korona, Ruby Millatos sa Barangay La Union maoy Miss Buko Festival, Sheila Tecson-Miss Eco-Tourism sa Barangay Singaran, 1st Runner Up nakuha ni Chinny Mild Recososa Maquiling sa Poblacion ug 2nd Runner-Up nakuha ni Angeline Casulawon Batongga sa Barangay New Argao.|M. Bala
