General Santos City— Gihingusgan ni Police Senior Inspector Fernando Manuel Jr. labaw sa City Drug Enforcement Unit (CDEU) nga usa ka lehitimong buybust operation ang ilahang gipahigayon kagabii sa may Chongson St., Brgy. Lagao ning dakbayan nga misangko ngadto sa usa ka shootout human matud pang misukol ang target.
Target sa maong operasyon ang usa ka Janrafael Eco, Alyas Toto ug anak ni Brgy. South Kagawad Alvin Eco.
Pamahayag ni PSI Manuel, positibong napalitan ug illegal nga druga ang nahisgutan apan una matud pang nagpabuto ug pusil, gani, gibanggaan matud pa niini ang sakyanan sa operatiba gamit ang multicab nga gisakyan sa suspek rason nga napgos silang pabuthan.
Dugang pa niya nga narekober gikan sa posisyon sa suspek ang duha ka bugkos nga marjiuana ingon man marked money, lakip na ang caliber 45 nga armas nga gigamit niini.
Pagpaklaro ni PSI Manuel nga narekober usab ang cellphone nga gigamit sa suspek alang sa illegal nga transaksyon kung asa anaa ang kambyuanay ug text alang sa maong operasyon.
Gihingusgan man usab niini nga andam nilang atubangon unsa man ang akusasyon sa kabanay sa suspek apan gipaklaro niini nga lehitimo ang maong operasyon.
