Davao City – Parehong nagpabaya sa ilang responsibilidad ang New City Commercial Center kun NCCC Management ug ang Department of Labor and Employment (DOLE) Davao Region sa gidangatang kalbaryo sa gatusan ka mga empleyado tungod sa kainit sa Victoria Plaza nga ilang gi-antos sulod na sa unom ka bulan human nadaut ang centralized aircon sa maong mall.
Gipalanog ni Nagkaisa Coalition Labor Focal Person Mike Ybañez nga kun wala pa lamang nagpasagad ang DOLE-XI sa ilang trabaho diha sa pagsusi sa mga establisimiento, wala unta mag-antos og taas nga panahon sa kainit sa mall ang mga empleyado diin ang uban kanila nangasakit na.
Gipasabot ni Ybañez nga ubos sa balaud, mandated ang mga labor safety inspectors nga magpahigayon og regular inspection sa mga kumpaniya aron maseguro kung natuman ba ang Occupational Safety and Health Standard Law diin ang makasupak, multahan og P100,000 matag adlaw.
Ug kini dayag kaayo nga wala gihimo sa mga labor inspectors kansang tahas mao angv pag-atiman sa mga working place dilemmas sama sa kainit sa Victoria Mall.
Andam mutanyag og tabang ang maong grupo ugaling pangayoon sa mga na-agrabyar nga empleyado ang ilang ayuda diha sa paghikutar og reklamo batok sa NCCC Management ug DOLE-XI nunot sa ilang kapakyasan sa paghatag og komportable ug luwas nga working place sa gitrabahoang kapin 30 na ka tuig nga mall, dugang ni Ybañez.
RadyoMaN Joel Viray
