Roxas City, Capiz – nagpatigayon sang rally ang kapin sa isa ka libo ka mga indibidwal nagikan sa mga nagkalainlain nga grupo sa syudad sang Roxas kag probinsya sang Capiz kadungan sang Labor Day.
Pila sa mga grupo nga nag-upod sa rally amo ang Gabriela, Anak-Pawis, Kabataan, Bayan-Capiz kag iban pa.
Ang amo nga aktibidad ang ginsuguran pinaagi sa isa ka parada antes ang ginpatigayon nga programa sa Roxas City Public Plaza.
Katuyuan sang amo nga rally nga pamatukan kag balabagan ang pila ka mga programa kag proyekto sang gobyerno, ilabi na ang mga programa sang administrasyon ni Presidente Rodrigo Duterte.
Suno sa mga ini nga naga-upang sa pag-umwad sang kabuhi sang mga pigado ang pila sa mga programa nga ginapatuman sang administrasyon.
Isa sa mga ginasinggitan sang mga progresibo nga grupo nga pataasan ang sweldo sang mga mamumugon bangud apektado na ka tama sang pagsaka sang presyo sang mga nagapanguna nga balaklon.
