Davao City – Makabungog nga mulo ang isinggit sa mga mamumuo sa pagahimoong protesta sa kadalanan subay selebrasyon sa adlaw pamuo karong adlawa.
Sumala ni Mike Ybanez, Nagkaisa Coalition Labor focal person, nga hitsas na ang ilang martsa uban ang laing mga sektor sa pamuo nga nakabase sa rehiyon onse.
Suma ni Ybanez nga usa sa ilang ipalanog mao ang kapakyasan sa saad ni Pangulong Rodrigo Duterte nga humanon ang ENDO kun kontrakwalisasyon sa nasud.
Si Nagkaisa Coalition Group Davao City Secretary General Joel Banas nagkayon nga wala gihapoy kausaban ang kahimtang sa mga trabahante kay padayon gihapon sila nag-antos sa kakuwang sa benepisyo, gamay nga sweldo, hulga sa panarbaho ubos sa administrasyong Duterte.
Sa kapin duha ka tuig nga anaa sa gahom si Pangulong Duterte makita gihapon ang pagsampila sa mga trabahante gumikan sa pagkitil sa ilang mga katungod nga maglipay sa mga benepisyo nga alang unta sa mga mamumuo.
Suma ni Banas nga bisan gani ang mga regular nga mga empleyado nahikawan sab sa paglunang sa mga benepisyo ug nagpasabot lang kini nga hangtud karon gapos gihapon ang mga trabahante sa mga abuso sa panarbaho tungod sa pakyas sa pagtuldok sa Endo.
Maisugon nga gisukmatan ni Banas ang Gobyernong Duterte sa kapakyasan sa pagsanong sa ilang pana-wagan nga wagtangon ang Regional Wage Rate ug i-imposar ang Living Wage sa tibuok nasud kay sa ani nga paagi maharuhay ang mga mamumuo sa ilang kinabuhi uban sa ilang pamilya.
Gibarugan sa Nagkaisa Coalition Labor Davao City nga panahon na aron patas-an ang suhulon sa mga trabahante sa tanang probinsiya nunot sa kamahal sa mga palitonon sa tibuok.
Busa malaumon si Banas nga sa nabiling mga tuig sa gahom ni Pres. Duterte tumanon na niini ang pagtapos sa Endo aron wala na’y mga trabahante mawad-an og katungod nga maglipay sa mga benepis-yo nga alang unta kanila.
Samtang pikas bahin, giila ni Joel Banas ang mga nahimo ug natabang sa Administrasyong Duterte sa mga OFWs, ug hagit niini ngadto sa kagamhanan mao nga mas palig-unon ug pakusgan ang ekonomiya sa nasud aron wala nay Pilipino mangahas manarbaho sa laing nasud.
RadyoMaN Joel Viray
