Davao City – Giuyonan karon sa usaka workers organization ang sentimyemento sa mga respondents sa survey sa Pulse Asia kinsa nagkanayon nga mas maayo unahon sa gobyerno ang pagsulbad sa pagmahal sa nag-unang mga palitonon sa merkadohan karon.
Giuyonan ni Nagkakaisa Labor Group convenor Joel Banas ang panawagan sa mga tawo ngadto sa kagamhanan karon ang pag-prayoridad sa pagtuldok sa kataas sa inflation rate inay nga unahon ang pamulitika.
Gumikan niini, naggilaid na ang katawhan hatud sa kamahal sa mga palitonon karon ug lisod na mapaigo sa tibuok buwan nga panginahanglanon ang sweldo alang sa mga ordinary wage earners lamang.
Gibasol ni Banas ang Tax Reform Acceleration and Inclusion Law (TRAIN Law) kung nganong nasinatian ang taas nga inflation rate sa nasud karong panahona partikular sa pagbutang og Excise Tax sa produktong petrolyo.
Busa gidasig niini ang kagamhanan sa pagsuspender usa sa buluhisan sa produktong petrolyo aron musunod og pag-ubos ang presyo sa basic ug prime commodities nga magsalbar sa yanong katawhan gikan sa kalisud-ekonomikanhon.
RadyoMaN Joel Viray
