Davao City – Patay ang usa ka 48 anyos nga lalaki nga si Alfred Farola, stay-in worker sa usa ka garahean og taxi sa may Lower Dampa Magtuod Maa ning siyudad human kini mahulog sa usa ka lungag nga gitoohang gigamit sa treasure hunting.
Base sa report, bandang hapon sa adlaw’ng Lunes dunay tulo ka mga managsuon nga sila si Ruel, Ronald ug Junas Montejo, pulos hamtong ang pangedaron ug residente sa nahisgutan nga lugar.
Diha sulod sa ilang compound naglungag ang mga naasoy gumikan sa pagto-o nga dunay gilubong nga usa ka dakung bahandi.
Miabot na ngadto 60-70 ka piye ang gilawmon niining sikretong nag operate sulod sa lima na ka bulan.
Atung higayona nasudlan og tubog ang maong bangag tungod sa sagunson nga pag-ulan rason nga nakadesisyon ang managsuon nga inaog ang generator set nga makapa-andar sa isa ka makina nga mokuha sa tubig sa ilawom alang sa ilang padayong pagkalot.
Nasayran nga nangahilo sila sa aso gikan sa tambutso sa maong makinarya diin ang duha sa managsuon nawalaan og panimu-ot.
Nakapanawag og tabang ang usa kanila diin kini nadungog sa biktima.
Malampusong na-rescue ni Farola ang tulo gamit ang pisi apan nahulog kini diin gituohang naparok ang ulo sa bato ug nalumos sa tubig sulod sa bangag.
Gitabangan sa Urban Search and Reascue (USAR) 911 ang biktima apan deklaradong dead on arrival sa Southern Philippines Medical Center (SPMC).
Sa pagkakaron gimandoan ang pamilyang Montejo nga undangon ilang aktibidad aron dili na mausab pa ang susamang aksidente.
UPDATE:
Wala gi-release pagawas sa morgue sa Southern Philippines Medical Center (SPMC) ang patay’ng lawas sa biktima nga si Alfred Farola human tulo ka mga nagpailang asawa ang nisulay og claim niini.
Matud pa, ang giingong unang asawa nga taga Ma-a ang nisulay og claim niini apan naglibog ang taga-morgue human adunay laing duha ang nagpailang asawa sa biktima.
Gibarugan sa nagdumala sa SPMC nga hangtod walay gipakita nga marriage contract uban sa biktima dili nila kini i-release.
Sa pagkakaron anaa pa gihapon sa morgue sa SPMC ang biktima.
RadyoMaN Paul Canono
