BACOLOD CITY – (1st Update) Wala naghilituhog ang pahayag sang manager sang isa ka bakeshop nga nabalhag sa blotter entry kag sang team leader/cashier angut sa isa ka insidente nga natabo pasado las 7 kagab-i sa dalan Burgos, Brgy. 19 Bacolod City.
Ini kasunod nga base sa blotter report sang Police Station 1, ginparecord ni Mark Russel Diamante, 29 anyos ang edad, pumuluyo sang Purok Cordova, Brgy. 18 Bacolod City, Manager sang Pandesal Express Bakery nga mga las 6:30 kagab-i, sang manugsira na ang ila tinapayan, may duha ka lalaki nga nagpakuno-kuno nga customer.
Nakibot na lamang siya suno kay Russel sang hinali nga nagdeklarar sang hold-up ang amo nga duha ka mga lalaki kag nagsiling “ ihatag lang da ang dapat mo ihatag.”
Suno kay Russel nga bangud sang kakulba, iya ginhatag ang kapin P27 mil pesos nila nga benta.
Apang sa interview naman sang DYHB kay Ferlito Daulo, 21 anyos ang edad, cashier kag team leader sang Pandesal Express, nga ang natabo amo nga sang manugsira na ang ila bakery ukon antes nila ginpapanaug ang roll-up door, ini sila ang nagkadto anay sa ila staff house sa tabok dalan.
Kag sa ila pagbalik, wala na ang kapin 11 tanan ka mga cellphones nga nakasulod sa plastic nga iya sang mga empleyado nga iya ginbutang sa kilid sang bakery. Wala man sang nagtaya sa iya ukon may nagdekalara hold-up, ukon cash nga nakuha sa ila benta bangod ang 27 mil, bili ina sang tanan nga mga cellphones nga ginkawat.
Nahibaluan nga kabahin sang pagsulundan sang bakery nga sa pagsugod sang trabaho, ginabilin sang mga empleyado ang ila cellphone kag ang in-charge nga nagatago sini amo si Ferlito.
Suno kay Ferlito nga balikon niya na kon tani ang mga cellphones nga nalipatan, apang may nakita ini nga tawo nga nagdali dali lakat sa atubang sang bakery kag ginbitbit ang plastic. Likod nalang ang iya nakita.
Sa karon, padayon pa nga ginaverify sang Police Station 1 paagi sa mga CCTV sa palibot kon anu gid ang matuod nga natabo. /dyHB BACOLOD
