Laing enkwentro sa militar batok NPA natigayon sa Malapatan, Sarangani

GENERAL SANTOS CITY – laing engkwentro na usab tali sa kasundaluhan nga sakop sa 73rd Infantry Battalion ug New People’s army ang natigayon sa upper Suyan, Malapatan, Sarangani Province, Lunes, August 7, 2017.

Sumala ni Lt. Daryl Cansancio, tigpamaba sa 73rd Infantry Battalion, Philippine Army , alas 2:00 ang takna nahitabo ang panag-engkwentro sa nabukid nga bahin sa maong lugar.

Mukabat matud pa sa dili muubos ug 20 ka mga miyembro sa Guerilla Front 71 ang nakatagbo sa tropa sa 73rd infantry battalion nga gipangunahan ni Kumander Dong ug Kumander Jurry. Miluntad ug halos 10 ngadto na sa 15 minutos ang binayluay ug bala sa mga nahisgutan.


Nasayran nga nagpahigayon ug clearing operation ang tropa sa militar sa lugar human nahitabo ang engkwentro tali sa mga rebeldi ug kasundaluhan sa Brgy Little Baguio, Malita, Davao Occidental niadotng nakalabayng simana nga gikamatay sa usa ka miembro sa NPA nga si Jimmy Tumbo, 22, residenti sa Sitio Akbual, Barangay Upper Suyan Malapatan Sarangani.

Usa ka pack bag nga adunay sulod nga mga pagkaon, personal nga mga gamit ug subersibong dokumento ang narekober sa kapulisan sa lugar. Samtang positibo usab si Lt. Daryll Cansancio nga adunay samdan sa grupo sa NPA tungod na usab sa mga lama sa dugo nga nakit-an didto sa lugar nga nahitabuan sa engkwentro.

Nasayran nga mi-withraw ang mga rebeldi human nga wala makaatraka sa ihap sa mga sundalong nakigbatok kanila.

Samtang subay usab sa pahayag sa mga residenti sa lugar nga adunay nakit-an nga tulo ka mga tawo nga gidayungan sa mga armado nga miagi sa ilang lugar. Sa kasamtangan ginaberipika pa nila ang maong report.

Sa kasamtangan kontrolado na ang sitwasyon sa lugar apan padayon pa gihapon ang gihimong clearing operation batok sa mga rebeldi.

Facebook Comments