Laing grupo na usab sa mga sakop sa lokal nga terorista sa Lanao del Sur ang mitahan ngadto sa militar dala ang ilang mga armas.
Alas-5:00 sa hapon niadtong Dominggo, Oktubre 20, usa ka nailang Satar Emmandatu ang mitahan ngadto sa 55th Infantry Battalion dala ang iyang calibre 30 nga garand rifle. Si Emmandatu nagpabuto sa iyang armas niadtong Oktubre 16 sa Barangay Ngingir sa lungsod sa Calanogas.
Alas-7:00 sa gabii sa susamang adlaw, laing M653 ug M16A1 nga rpple, mga magazine ug bala ang gisurender usab ngadto sa 82 Infantry Battalion. Wala na ginganlan sa militar kung kinsa ang nagsurender niini.
Alas-2:00 sa hapon kagahapon, Lunes, Oktubre 21, usa ka Aminudin Datu, kinsa naila usab sa alyas nga Jannah ug Abu Nasraula, mitahan ngadto sa 82nd Infantry Battalion dala ang iyang Browning automatic rifle, usa ka calibre 45 nga pistola, mga magazine ug mga bala.
Matud pa ni LtCol. Rafman Altre, commander sa 82IB, si Datu nalambigit sa sunod-sunod nga engkuwentro sa Barangay Gacap, lungsod sa Piagapo, sa Marawi City ug uban pang dapit sa Lanao del Sur sa wala pa mahitabo ang Marawi siege.
Nagsilbi usab kini nga guide sa mga lokal nga terorista sa ilang pag-atake sa Piagapo.
Matud pa ni Col. Jose Maria Cuerpo, commander sa 103rd Infantry Brigade nga naka-base sa Marawi City, nga tungod sa maong kalamboan, iyang gidayeg ang mga residente sa lalawigan nga nagmahal sa kalinaw o mga peace-loving people, mga opisyal sa kagamhanang lokal ug mga stakeholders.
Ipadayon usab, matud pa, sa militar ang ilang kolaborasyon ngadto sa mga residente aron dasigon pa ang mga nahibilin ug mga bag-ong miyembro sa teroristang grupo nga motahan ngadto kanila dala ang ilang mga armas.
