Davao City – Gipahimangnoan ang mga residente sa Fr. Selga st., Brgy. 8-A, Davao City nga magmaigmaton sa pagdawdaw sa mga kabtangan sa nasunog nga kabalayan sa nasangpit nga lugar.
Kini human nga gibutyag ni Kagawad Ruben Dungzal atol sa pakighinabi sa DXDC RMN Davao nga dunay miulbo kagahapong adlawa sa fire incident area tungod sa gisunog nga mga bronze sa ubang mga residente sa lugar aron matimbang ug mabaligya.
Hinuon matud ni Dungzal, daling napalong ang kalayo human daling miresponde ang kabomberohan, 911 ug kapulisan sa nasangpit nga area.
Sa pikas bahin, nagpadayon ang paghatag og ayuda sa City Social Services and Development Office kun CSSDO ngadto sa mga apektadong residente sa sunog gani naghimo na usab sila og mapping ug profiling aron masuta ug maandam na ang tabang pinansyal ngadto sa mga naapektuhan sa maong insidente.
RadyoMaN Renz Barbarona
