Davao City – Bun-og ang natagamtaman sa usa ka lalake human gimartilyo sa kapuyo sa wala pa masayri nga hinungdan 7:00 sa gabii.
Nahitabo ang insidente sa balay sa uyoan sa biktima nga si alyas Dodong ug residente sa Doña Pilar Sasa ning siyudad sa Dabaw.
Kalit lamang matud pa mibutho ang kapuyo nga si alyas Jane sa atubangan ni alyas Dodong ug sa igong rason kalit gibunalan ang pipila ka parte sa lawas sa biktima gamit ang martilyo.
Apan maayo na lang kay wala kaayo maantimano og bunal ang biktima mao nga luwas na kini sa kuyaw nga kahimtang.
Human sa mao nga panghitabo gilayon midangop sa Presinto 4 ang biktima aron ipatala ang gibuhat sa iyang kapuyo ngadto kaniya.
Hangtud ani nga pagbalita, wala pa’y gikataho kun interesado ba muduso og kaso si alyas Dodong batok kang alyas Jane o dili ba kaha nagkasinabot ra usab sila.
RadyoMaN Joel Viray
