Roxas City, Capiz- Ginpreso sa Roxas City PNP ang isa ka persona nga wala makabayad sang ila gin-inom sa restobar nga nahamtang sa Sitio Mason Brgy. Banica, Roxas City.
Nakilala ang ginareklamo kay Ramil Espinosa alyas Andok, yara sa legal nga pang-edaron kag residente sang Barangay Maindang, Cuartero, Capiz.
Ginpahayag sang floor manager nga si Cherry Hilado, nagkuha pa sang gin-table nga babaye si Espinosa kag nagalab-ot sa 3,920 pesos ang Kabug-usan ngq balayran sini.
Apang sang ginpakita na ang ila bill, nagpalagyo ang kaupdanan sini kag ginbalibad nga magpangita sang inugbayad kabangdanan nga ginkustodiya anay si Espinosa.
Gin release naman ini matapos ang period sa pagkustodiya sa iya kag ginbayaran sang iya pamilya ang kantidad sang ila gin-inom.
