Sa interbyu sa DXDC RMN Davao kang Police Staff Sergeant Ronelyn Gomez, imbestigador sa Matanao Municipal Police Station (MPS), giila niini ang biktima nga si Bonifacio Ontoy, 52 anyos, mag-uuma nga taga Sitio Bajada, Barangay Towak.
Saysay sa pulis, base usab sa nakasaksi sa krimen, nag-inom ang duha ka lalaki nga mga Blaan sa usa ka tindahan sa dihang miagi ang hubog nga biktima ug didto na sila gibugal-bugalan.
“Nakadungog sa iyang istorya nga gusto siya magpatay og Blaan. Mao ‘to nasuko (ang mga suspek). Mao na ang motibo sa hitabo nga gibugalbugalan sila nga Blaan,” sulti sa imbestigador.
Tungod sa kalagot sa duha, gamit ang sundang ilahang gitigbas ang biktima sa nagkadaiyang parte sa iyang lawas, diin naputol ang hawak niini, ug wala na usab narekober ang iyahang walang kamot ug tiil.
Nasayrang aduna nay kanhi kaso ang usa sa mga suspek apan nakagawas kini human namatay ang complainant. Kasamtangan usab nga napriso ang ilang igsoon o magulang tungod gihapon sa pagpanigbas.
Sa pagkakaron, ginahikay na ang kasong murder batok sa mga responsable sa brutal nga krimen.
RadyoMaN Kirby Manzon
