Davao City – Nagpatabang sa San Pedro PNP ang usa ka lalaki naila sa pangalang Roland Pepito, 39 anyos nagpuyo sa Arroyo Compound Matina Aplaya Davao City.
Matud pa iyang gireklamo ang iyang kauban sa trabaho nga Indian National naila sa pangalang Patel Manojkumar Ranchudbahai, 48 anyos ug kasamtangan nagpuyo sa Gahul Bajada ning syudad sa Davao.
Sumala sa report gikan sa San Pedro, alas 5:30 sa hapon niadtong petsa 1 sa bulan sa Hulyo samtang si Pepito nag trabaho kalit kini giduol sa suspek ug gihiwa ang iyang blue nga T-shirt gamit ang kutsilyo ug gibaharan nga patyon hinungdan daling nagpatabang sa kapolisan ang biktima.
Daling giadtuan sa kapolisan sa pagpanguna ni Police Officer 1 Gallarde ug gisikop ang suspek diin nasuta sa mga pulis nga dunay panagbangi ug way pagsinabtanay ang duruha sa ilang trabaho hinungdan nga nabuhat kini sa suspek.
Hinuon naalegro ra sab ug nagpinasayloay ang duha sa maayong kabubut-on atubangan sa kapolisan.
RadyoMaN Don Pulayao
