Sa interview sa DXDC RMN Davao kang Gebby Solano, iyang gibutyag nga misinggit lang siya aron ipahibalo nga sila nabangga ug nasabaan ang mga tawo hinungdan nga siya matud pa gipasakitan. Hinuon, giangkon nga aduna man siyay mali apan alang kaniya ug sa iyang pamilya, dili makatarunganon ang pagposas, pagsagpa, pagkulata ug pagkumot sa iyang baba.
“Pero naa gyud koy mali, na-over ko sa curfew, nagsinggit-singgit mi. Angkunon nako na nga mali nako. Ang nakaapan lang, nganong naay posas? Nganong posasan man ta nga wala man koy sala nga dako nga kanang nagbuhat og krimen nga mitakas ko. Nganong ing-ana? Na-settle na gud, okay na gud siya. Nakaapan lang, dili kadawat akong mga uyuan ug igsuon nganong giing-ato ko sa nakita nila sa video. Nganong gisagpa-sagpa ko,” saysay pa ni Solano.
Samtang sa interview sab sa DXDC kang Police Corporal Aljun Ago, Desk Officer sa Pantukan Municipal Police Station (MPS), giklaro sab nila nga dili pulis ang nagposas kang Solano sukwahi sa mga post nga mikatag sa social media. Ug gibutyag nga sa barangay na mag-abot ang duha ka kampo aron mahisgutan ang mao kaso.
“Di pud mi kaingon nga settled na kay gipaadto man namo to sa barangay para didto sila magka storyahay. Angkon man pud niya iyang sala nga nabuhat niya tong ing-ato tapos social media pud. Mao to nangayo pud siyag dispensa,” dugang pa ni Ago.
Sa karon, abri usab ang buhatan sa DXDC RMN Davao alang sa pagpaminaw sab sa kampo sa Purok Chairman nga gireklamo.
RadyoMaN Ivy Parido
