Lalaki gipusil sa kainom

Davao City – Daling gidala ang usa ka lalaki sa balay tambalanan human gipusil kini sa iyang kainom sa may Brgy. Coronon, Sta. Cruz, Davao del Sur.

Giila ang biktima nga si Ariel Batoto Alicte, 39 anyos ug residente sa nasangpit nga lugar.

Base sa imbestigasyon sa kapulisan nga bandang alas 5:30 sa kahaponon, nakig inom ang biktima sa duha niya ka higala ug usa diha ang suspek sa pagpamusil nga giilang si Dodong Alvarado.


Sumala pa nga igo lang sila naghisgut sa pagpanunggab nga nahitabo duol sa ilang lugar apan kalit kuno milakaw si Alvarado ug sa pagbalik niini bitbit na niya ang .45 kalibreng pistola ug gipusil ang biktima sa makatulo ka higayun igo sa iyang likod.

Human sa pagpamusil, daling misibat ang maong suspek ug narekober sa kapulisan sa ang tulo ka basiyo sa bala gikan sa crime scene.

Gidala una sa Lagrada Medical clinic ang biktima apan gi-refer kini sa Southern Philippines Medical Center kun SPMC ning siyudad.

Sa karon, naghimo na og hot pursuit operation ang kapulisan aron masikop ang maong suspetsado.

RadyoMaN Paul Canono

Facebook Comments