Davao City – Nahog sa madugo-on nga panghitabo ang pagsugat sa pasko human misangko sa pagpamusil ang paglipay sa magbarkada gahapong adlawa.
Alayon ani, kritikal ang kahimtang sulod sa Southern Philippines Medical Center (SPMC) si Fernando Ramos, hingkod ang edad, ug nagpuyo sa Barangay Tigatto Distrito sa Buhangin syudad sa Davao, human pusila ni Raffy Mamarinta gamit ang wala masayring armas.
Sa wala pa mahitabo ang krimen, nagbinuntagay og inum ang biktima ug ang suspek atol sa selebrasyon sa Pasko apan dihang pareho nang nahubog kalit lang nanumbag ang suspek apan nalupig kini sa biktima maong mi-uli ang uwahi.
Pipila ka gutlo ang nakalabay, mibalik sa imnanan ang suspek ug gi-usban og sukmag ang biktima apan nalupig gihapon kini hinungdang mibunlot og pistola ang suspek dayon pusil tumong sa ulo sa biktima nga nahitabo alas 2:00 sa hapon gahapong adlawa.
Daling gidala sa SPMC ang biktima apan gideklarang delikado ang kahimtang samtang ang suspek milayas human sa insidente.
RadyoMaN Joel Viray
