Davao City – Patay diha-diha ang usa ka lalaki human gitabangan og dunggab sa tulo ka wala mailhing suspetsado nga nahitabo sa Fernandez Store nga nahimutang sa Purok 15, Sta. Cruz, Indangan, Buhangin pasado alas-2:00 sa Domingo sa kadlawon.
Samad dinunggaban sa nagkadaiyang parte sa lawas ang mihuman sa kinabuhi ni Rolando Amban, 29 anyos, dunay kapuyo, ug nagpuyo sa maong dapit.
Sa imbestigasyon sa Buhangin PNP, nasuta nga nagsugod og inum ang biktima uban ang iyang igsoon nga si Leah Amban ug laing usa pasado alas-10:00 sa gabii niadtong Sabado.
Apan samtang nangihi si Leah sa CR daling mipahibawo kaniya si Jen Mark Alozado nga gitabangan og luba sa tulo ka lalaki ang iyang igsoon.
Pag-abot sa igsoon sa tindahan nagbuy-od na sa yuta ug naligo na sa kaugalingong dugo ang biktima apan midagan sila palayo dihang sila na usab ang gipuntarya sa mga mamumuno.
Human sa krimen, ang mga suspetsado yano rang nagbaktas palayo sa lugar maong wala na sila maabti sa mga pulis nga miresponde sa panghitabo.
Nasayran sa mga imbestigador nga empleyado sa Aero Foam kansang buhatan nahimutang sa samang dapit ang mga suspek.
Padayon pa ginasuta sa mga imbestigador ang tinuod nga motibo sa pagluba-patay sa biktima samtang naglusad na og manhunt operation ang kapulisan aron dakpon ang mga suspek nga at-large pa hangtud karong panahona.
RadyoMaN Joel Viray
