Ginkumpirmar ni Police Captain Leomendo Tayopon, hepe sang Dumalag Police Station nga magkarelasyon ang babaye kag lalaki nga bangkay na sang masapwan sa Dumarao kag Dumalag, Capiz kahapon sang aga, Oktubre 10.
Ginkilala ang mga biktima nga sanday Jroa Lopez, taga syudad sang Iloilo, may igo sang bala sa ulo kag likod kag ginhal-id sa Barangay Dolores, Dumalag, Capiz .
Samtang ang babaye amo si Rose Bering, 28 anyos, taga Dangula-an, Anilao, Iloilo, may igo sa guya, liog, kag likod, kag ginhal-id sa kilid sang national road malapit sa atubang sang Capiz State University ukon CAPSU – Dumarao Campus.
Suno kay Tayopon,ginkumpirmar sang utod ni Bering nga may relasyon ang mga biktima.
Suno naman kay Police Captain Larnel Frial, hepe sang Dumarao Police Station, may live-in partner si Bering sa Cudian, Ivisan apang nakigbulag ang biktima isa ka bulan na ang nakaligad.
Santu sa cctv footage, duha ka salakyan ang nakit-an nga nagsulod sa Dumalag mga 1:00 sa kaagahon kag nagpadulong sa Dumarao mga 1:45 sang kaagahon.
Dugang pa ni Frial nga nagapakig-angut na sila sa iban pa nga police stations bangud nagpadulong sa Iloilo ang duha ka salakyan sang mga suspetsado.
Nagapadayon ang imbestigasyon sang mga otoridad agud matul-id ang motibo sang insidente.
