Sindangan, ZDN-Wala nay kinabuhi sa dihang gidala sa balay tambalanan ang usa ka biktima human kini naaksidente samtang nagmaneho ug motorsiklo didto sa may dalang Nasyunal, Brgy. Goleo, Sindangan, ZDN partikular didto sa tulay nahitabo kini niadtong sa miaging adlaw mga 8:30PM.
Ang biktima mao si Wilbert Andahan Cruz, 20 anyos, iyang gimaneho ang usa ka Rusi motor.
Sa resulta sa imbistigasyon sa kapulisan sa Sindangan, nagbyahe kini gikan sa iyang pinuy-anan sa Lower Inuman padulong sa Pob. Sindangan, ZDN.
Matod pa nga tulin kaayo ang pagpadagan ni Wilbert bisan ug walay suga niadtong gabhiona.
Niadtong puntoha sa dihang nahidangat kini siya sa may tulay, ang aksidente kining na danlog ug nabaliwliw ang iyang gisakyan nga motor ug maayong pagkaparok sa iyang ulo sa kongretong barrier.
Nakaangkon ug seryosong bun-og sa ulo ang biktima nga maoy hinungdan sa mitsa sa iyang kamatayon.
Dugang butyag sa kapulisan sa Sindangan nga ang maong biktima hubog niadtong higayona sa dihang nagmaneho sa maong motorsiklo.
