iFM Laoag – Mapilaan ti kaso a Direct Assault ken Alarm and Scandal ti maysa a lalaki kalpasan ti panagprobprobokarna ken panangdangranna ti maysa a Patrolman itay parbangon, 1:35 am iti Brgy. 2 Anao, Piddig, Ilocos Norte.
Nabigbig ti suspek a ni Mr. Marco Sy y Campus, agtawen ti tallupulo ket walo, awanan ti trabaho ken residente metlaeng iti nadakamat a barangay.
Segun kenni Pol. Capt. Kristoffer King Ramos, Chief of Police iti PNP Piddig, ti suspek ket addaan ti impluensia iti arak idi nagprobprobokar ken nagibubuong ti botbote iti paset ti National High Way iti Brgy. 2 Anao, Piddig.
Gapu iti daytoy tiniliwda nga insigida ni Sy para iti pannakaeksaminarna iti Piddig District Hospital sakbay a naipakustodiar iti pulisia. Idin ta iti pannakatalinaedna iti istasion apaman a nalpas ti eksaminasion ket ditoy nagprobokar manen iti uneg ti istasion nu sadinno dinangranna ti maysa a Patrolman a nakabettakan ti bibig ken nakasugsugatan iti akin kattigid a rupa ti Patrolman ken pinagsasaoanna dagitoy ti “AWAN PULIS PULIS KANIAK”.
Dumalan ti inquest proceedings ni Sy ita metlaeng nga aldaw ken maipan iti Ilocos Norte Provincial Jail para iti pannakaiyuli ti kasona iti korte. (Joe Anne Agustin)
