Lalaki nakatulog sa PUJ nahulog kritikal

Davao City – Kritikal ang kahimtang sa 32 anyos nga lalaki nga si Jose Tagas Jr., human nahulog sa gisakyang Jeep tungod sa tumang kahubog.

Base sa report, misakay tapad sa driver ang maong biktima alas 10:00 pasado sa gabii ug pag-abot sa Mc Arthur Highway partikular sa kanto Ecoland ning syudad, kalit na naablihan ang pultahan sa passenger side sa maong multicab ug nahulog ang biktima ug maayong pagkaparok ang ulo niini sa sementadong dalan nga miresulta sa pagka-angol.

Dali kining gitabang sa BDRRMC Matina crossing ang biktima ug gihatud sa Southern Philippines Medical Center (SPMC) ug sa karon anaa pa gihapon sa talandugong kahimtang.


Subay nini gitawagan ang mga kabanay sa biktima nga moadto sa hospital kay gikinahanglan ang ilang presensiya sa SPMC.

RadyoMaN Paul Canono

Facebook Comments