Sa interview sa DXDC RMN Davao kang PSMS Ian Roy Ildefonso sa investigation section sa Magsaysay Municipal Police Station, iyahang giila ang suspect nga si Floreto Malanas, 33 anyos taga Jose Abad Santos, Davao Occidental.
Saysay sa pulis nga alas 4:00 sa kaadlawon niadtong adlawa sa dihang kalit lang gitigbas sa suspect ang iyahang natulog nga ig-agaw nga kauban sab trabaho nga nailang si Rhedick Caluyan, hamtong. Dayon, kini misibat ug giilogan sab niya og sundang ang nakasugat nga si Genes Navarro, 50 anyos ug nanigbas hinungdan nga kini naangol.
“Nisibat ang ig-agaw (sa biktima). Nakasugat man gud ni’ng (suspect) og tawo nga nagdala’g sundang, iyahang giilogan. Mao ‘ni iyang natigbasan pud. Nahadlok ang mga tao kay wala pa man gud siya nadakpan ato dayon, pagkaugma pa,” saysay sa pulis.
Nadakpan sab ang suspect atol sa hot pursuit operation sa Brgy. San Isidro ug mag-atubang og kasong attempted murder. Matud sa kabanay sa suspect, duna matud pay problema sa pangisip ang biktima diin na-confine na kini kaniadto sa mental ug hospital ug duna kini maintenance nga tambal.
RadyoMaN Kirby Manzon
