iFM Laoag – Naarestar ti maysa a lalaki kalpasan ti aksidente a panangpaltogna iti metlaeng padana a lalaki iti Brgy. 22 San Cristobal, Sarrat, Ilocos Norte.
Nabigbig ti suspek a ni Mr. Regie Ganotisi y SabiƱano, agtawen tallupulo ket innem (36), awanan asawa, maysa a karpintero ken residente ti nadakamat a lugar idin to nga iti biktima ket ni Mr. Roliver Bangalan y Manuel, agtawen tallupulo ket walo (38), residente iti Pamplona, Cagayan. Segun iti imbestigasion ti PNP Sarrat, ti biktima (Mr. Bangalan) ket napan nagrasaw rasaw iti solar ti suspek (Mr. Ganotisi) idi alas dies ti rabii (22:00) ti Noviembre 11, 2019 a rumrumwar nga agap apada iti nobiana a kabsat ti suspek a ni Mrs. Jane Maruta y Ganotisi.
Inlawlawag ti suspek nga inanawana ti biktima iti umuna a gundaway a papanna iti balayda a nagrasaw rasawan. Innayunna a nagawid ti biktima apaman ti diskusionda ngem di la mabiit ket nagsubli manen daytoy iti balayda ket ditoyen a nagsinnungbatda.
Inbatad ti suspek a nakitana nga immasut ti paltug ni Mr. Bangalan ket ditan a napakigtotan isu a pinadasna nga inagaw daytoy ngem apaman nga agininnagawda ket aksidente a nakalbitna iti paltug nga ikut ti biktima ket ditoy a naudatal idi napuntaan ti bagi ken iti abagana.
Naideklarar met a Dead On the Spot iti biktima basar ti panangeksaminar ni Dr. Jeniffer Valdez Bueno, Sarrat Municipal Health Officer, SOCO Team ken Crime Laboratory iti ili idi napasamak ti insidente.
Narekobre met ti PNP Sarrat ti maysa a backpack a naglaon ti maysa a kalibre baente dos (caliber 22 magnum) nga addan ti tallo a bala (3 live ammunition), ti nausar a hand gun revolver magnum 357 nga addan iti uppat a bala ken dua a fired cartridge shell, narekobre pay ti maysa a selyado a plastic a maipagarop a naglaon ti marijuana iti akin kannawan a bulsa ti biktima.
Iti agdama ti suspek ket adda iti kustodiar ti PNP Sarrat ken manamnama a mapilaan ti kaso a murder. (Joe Anne Agustin, RMN News)
