Davao City- Gumikan sa kahubog ug bikil sa sugal nga hantak, misangko kini sa pagpamusil sa usa ka suspek ngadto sa biktima.
Nahitabo ang krimen alas dos sa hapon sa purok 19 San Gabriel Barangay Mintal, Tugbok District ning syudad sa Davao.
Ang blotter sa Tugbok PNP nag ila sa biktima nga si Eliezer Bolotano Bayaron, 35 anyos residente sa maong barangay samtang ang gitudlong suspek sa pagpamusil mao si Ferdinand Manija Borjal 52 anyos silingan sa biktima.
Sa imbestigasyon sa Homicide Section sa Tugbok PNP, nasayran nga nag inum ug nagdulag hantak ang duha ug misangko kini sa panaglalis hangtud nga nakahukom ang biktima nga mupalayo nalang sa maong dapit.
Samtang nagbaktas ang biktima kauban ang iyang 10 anyos nga anak nga lalake kalit lamang mibabag sa dalan ang suspek nga nagbitbit na ug .38 kalibre nga pistola.
Nakita sa anak nga gition sa suspek tumong sa dughan sa iyang amahan ang revolver dayong gipabuto bisan paman sa pagpangayo’g pakiluoy sa biktima.
Daling misibat ang suspetsado nga maoy target karon sa hot pursuit operation sa kapulisan samtang ang biktima daling gidala sa mga mirespondeng residente sa Holy Spirit Community Hospital apan dali usab kining gibalhin sa Southern Philippines Medical Center.
Kasamang Erin Lumosbog
