Davao City – Daling gidala sa Southern Philippines Medical Center (SPMC) ang usa ka Billy Joe Sarin Dayagro, 28 anyos, ulitawo, residente sa may Ipil Beach Brgy. Vicente Duterte Agdao, sa dihang gipusil kini sa usa ka suspek nga nailang si Wagi Amante Jr., hamtung ang pangidaron ug residente sa Tibungco ning siyudad.
Sumala pa sa record nga nahipos sa Sta. Ana PNP nga ang biktima nagdula og billiard sa ilang lugar diin kalit miabot ang suspek ug sa walay daghang pangutana gipusil sa wala pa matino nga armas de fuego ang biktima igo sa may wala nga bahin sa iyang dughan.
Daling misibat ang suspek ug kasamtangang nag tago-tago na karon samtang dali usab gidala sa SPMC ang biktima nga ginatambalan hangtod karong panahona.
Nasayran sa kapolisan nga dugay nang ‘rival’ sa away ang duha ka mga nahisgutang lalaki gani kadaghan na kini nagsinumbagay sa ilang lugar.
Pikas bahin, kapolisan naghimo na og follow up investigation ug manhunt operation aron nga madakpan ang naasoy nga suspek.
RadyoMaN Paul Canono
