Kritikal ang kondisyon sa usa ka lalaki kinsa biktima sa pagpamusil nga nahitabo kagahapon sa may alas 7:30 ang takna sa buntag sa didto sa Barangay Sinonoc sakop sa dakbayan sa Dipolog.
Ang biktima giila sa kapolisan nga usa ka Mark Ponce Tague, 28 anyos, ug residente sa lungsod sa Polanco sakop ning probinsya diin temporaryo kini nga nagpuyo sa Barangay Sinonoc.
Gibutyag sa imbestigasyon sa Dapitan CPS nga sa wala pa mahitabo ang nasangpit nga insidente, si Tague ang miadto sa panimalay sa usa ka Luzy Pilarca aron magkolekta sa bayad sa dihang gipusil kini
sa usa ka suspek nga nakaangkas sa motorsiklo nga Ruzi kombinasyon sa bulok itom ug kahil.
Nakaangkon ang biktima sa tulo ka mga samad-pinusilan sa nagkadaiyang parte sa kalawasan niini diin gidala ang biktima sa tambalanan ug anaa karun sa kritikal nga kahimtang.
Mikagiw ang mga suspek sa wala masayring direksyon maoy hinungdan nga nagpahigayon gilayon sa hot pursuit operation ug checkpoint ang kapolisan.
Nakolekta gikan sa crime scene ang unom ka mga basiyo sa 9mm cal. pistol.
Nasayran nga adunay kaso sa homicide ang biktima sa lungsod sa Polanco ug kasamtangan pa nga gipahigayon ang pagdungog niini sa korte. (chai)
