Lalaki nga dunay patong-patong nga kaso, gipusil patay

Tukuran, Zamboanga del Sur – Patay diha-diha ang 43-anyos nga lalaki nga dunay patong-patong nga kaso human kining gipusil sa wala mailhing responsable sa Purok 5, Barangay Navalan, Tukuran, Zamboanga del Sur alas 5:10 kagahapon sa buntag.
Daling nitawag sa buhatan sa kapulisan sa Tukuran si Barangay Kagawad Belmar Paquera rason nga daling nibulhot ang tropa sa kapulisan sakay sa Mahindra Patrol Car pinaagi ni PSSg Cristopher Omamos.
Naabtan sa nirespondeng mga pulis nga naghigda nga wala nay kinabuhi sa gawas nga bahin sa iyang pinuy-anan ang biktima nga si Froilan Torres, 43-anyos, residente sa nasangpit nga lugar.
Usa ka igo pinusilan sa agtang ang naangkon sa biktima ug miresulta sa iyang hinanaling kamatayon.
Nakuha sa dapit nahitabuan ang usa ka basiyo sa bala sa calibre 45 nga pistola.
Sa inisyal nga imbestigasyon nasayran nga nalambigit si Torres sa kasong Carnapping nga dunay criminal case number 08-10580, dunay kasong Frustrated Homicide nga may criminal case number 06-10452 sa Branch 30 sa Regional Trial Court sa Aurora, Zamboanga del Sur ug dunay pending nga kasong Pagpanulis.
Naglusad na ug pursuit operation ang kapulisan alang sa possible nga pagkasikop sa mga suspetsado.