Detinado na karon sa PS3 Agora ang usa ka lalaki nga gi-ingong nalambigit sa pagpamaligya sa iligal nga druga diha sa Brgy. Patag ning syudad sa Cagayan de Oro. Kini human nga nasakote sa mga operatiba sa Agora Police sa pagpangulo ni Station Commander PCapt. Ernesto Miranda Sanchez sa ilang gilusad nga anti-illegal drug buy bust operation alas 10:30 ang takna kagabie.
Naila ang dinakpan nga 31 anyos nga si Jeffrey Laping, ulitawo nga walay trabaho ug residenti sa Zone 13 sa Brgy. Patag ning syudad kung diin napalitan sa usa ka sachet sa gituhoang shabu balor 500 pesos ang suspek nga maoy hinungdan sa iyang pagka-aresto.
Nakuha pa gikan sa posisyon sa suspek ang laing usa ka sachet sa gituhoang shabu kung diin gibana-banang motimbang sa 1gramo nga dunay street market value nga moabot sa 6,800 pesos. Lakip nga nakuha usa ka keypad cellphone ug ang 500 peso bill nga ginamit isip buy bust money.
Posibleng ipasaka sa korte karon ang kasong pagsupak sa RA 9165 batok sa suspetsado.
Kasama mo sa PS3 Agora, RadyoMaN Andy Coco, DXCC Tatak RMN!
