Dipolog City – Naadmit karon sa balay tambalanan ang usa ka lalaki nga biktima sa pagpamusil mga alas 6:45 sa niaging gabii didto kini nahitabo sa Barangay Diwan sakop ning dakbayan sa Dipolog.
Giila sa kapolisan ang biktima nga si Mario Engod Agapay 49 anyos, minyo, gikaigngon operator kini sa galingan samtang giila sab ang suspetsado nipusil nga si Alex Perigora Patilona, 22 anyos, ulitawo, usa ka maguuma, ug ang duha magsilingan sa maong barangay diin nahitabo ang krimen.
Sa kasayuran nga nakuha sa rmn dxdr ngadto sa buhatan sa Dipolog CPS, nasayran nga ang suspetsado nga si Alex Patilona samtang nihimo kini’g sangyaw, nangwali sa polong sa diyos ngadto sa iyang mga silingan atol nahiagi kining biktima nga si Mario Agapay nga kon diin giapil niinig wali butang nga gikasuko sumala pa kini sa biktima nga nisangpot nahinoon sa paglantugi.
Ang suspetsado wala ka pogong sa iyang kaugalingon, kalit kining nilanit sa gidala-dalang usa ka 38 revolvor nga diha gitagoan sa gitakin niining sling bag ug gipusil ang biktima kausa ka higayon nga maayong pagkaigo sa walang batiis.
Human sa pagpamusil ang suspetsado boluntaryo kining misurender ngadto sa niresponding mga police officer dala ang 38 revolver nga kargadao sa tulo ka buhing bala ug usa ka basiyo.
Samtang ang biktima nagkadugo gidali ngadto sa Zamboaga Del Norte Medical Center ning dakbayan ug karon gikatakdang operahanan ang bala naungot nga wa ka lapos.
Sa interview sa rmn news team, ngadto sa suspek didto sulod sa prisohan direkta nga giangkon niini ang nabuhat nga krimen nga sumala pa duna na silay daan bikil sa biktima nga maoy hinongdan nagdala dala na siya’g armas ug sa ilang pagtagbo pag-usab iyang giwalihan sa polong sa diyos nga gikasuko niini nisangpot sa pagpamusil.
Kasong attempted homicide ug pasupak sa paghupot sa dili lisensyadong armas ang posibleng atubangon unya sa suspetsado.
