Sa interview sa DXDC RMN Davao kang PSMS Julius Agayan, chief investigator sa Kapalong MPS, iyang giila ang biktima nga si Crispin Baton, 50 anyos, taga-Asuncion, Davao del Norte apan kasamtangang nagpuyo sa Kapalong ug nagapasamahero gamit ang iyang traysikad sa Maniki Poblacion.
Saysay sa imbestigador nga posibleng nagbaton og bangi ang biktima ug ang mga batan-on nga nag-inom daplin sa karsada nga miresulta sa pisikalan, rason nga siya nabunalan og bato.
“Ang ingon niya pag-istorya namo, nihapit gyud siya didto kay naa man daw nag-inom daw. Ambot unsay (nahitabo) kay kadtong tawhana daghan man to’g reklamo pud diri nga mangharang og sakyanan, kay halos kada gabii man gud to mahubog gud,” saysay sa pulis.
Daling gidala sa ospital si Baton nga nagkadugo human nga nasamdan sa ulo. Samtang, gipanaad sa pulis nga oras nga maila ang mga batan-on nga nagbunal og bato, ilang tabangan ang biktima nga mo-file og kaso.
RadyoMaN Kirby Manzon
