Mambusao, Capiz – Ginbawian sang kabuhi ang isa ka lalaki matapos nga maaksidente ang ginamaneho nga mtorsiklo sa Barangay Bunga, Mambusao, Capiz kaina sang kaagahon.Ginkilala ang biktima nga si Aniano Lampa Cardines Jr., 35-anyos sang Calinog, Iloilo.
Nag-angkon sang patal nga samad sa ulo kag lawas ang biktima nga gintunaan sang iya kamatayon. Base sa inisyal nga imbestigasyon sang Mambusao PNP, yara sa impluwensiya sang makahulubog nga ilimnon ang biktima sang magluntad ang aksidente.
Nagbunggo sa railing sang karsada ang motorsiklo sang biktima, rasun nga naglampus ang ulo sini. Alas 5:30 na sang aga nakit-an ang biktima sa lugar sang ginluntaran sang aksidente. Gindala pa sa mambusao District Hospital apang gindeklarar nga dead on arrival.
Nahibaluan nga ginselebrar pa ni Cardines upod sa iya asawa ang birthday sang ila anak. Apang bangud sang iya nga trabaho, nagpaalam ini nga magabalik sa Calinog, Iloilo mga 11:00 sang gab-i. Lipud sa ihibalo sang iya pamilya, nadisgrasya ang motorsiklo nga ginamaneho sang biktima, mga 200 metros ang kalayuon nagikan sa balay sang iya asawa.
