SILAY CITY – Patay ang 40 anyos nga si Ronilo Morillo alyas Butol sang Hacienda Culajao matapos nagbato sa mga otoridad sa ginpatigayon nga drug buybust kag rescue operation kahapon sang hapon sa Brgy. E. Lopez.
Si Morillo ang isa ka high value target kag amo ang ginatudlo nga nag-abduct sang 15 anyos nga menor de edad nga iya textmate nga taga Hacienda Banilad, Barangay Nangka, EB Magalona.
Ginasiling nga sadtong Sabado pa gin-abduct sang suspek ang dalagita apang kahapon lamang sang hapon narecover ang biktima matapos nagpangayo sang bulig ang iya nga tiya.
Ang bangkay sang suspetsado ang yara nahaya sa isa ka punerarya sa Silay City samtang ang 15 anyos nga dalagita ang igabalik sa iya mga himata paagi sa Womens and Children Protection Desk (WCPD) sang Silay City PNP.
Suno kay P/Major Rolly Pondevilla, hepe sang Silay City PNP, nga nagbato ang suspek sang ini ang gindakop rason nga napilitan ang otoridad nga ini ang tiruhon.
Wala labot sa suspected shabu, nakuha pa sa suspek ang isa ka calibre .38 nga armas.
Samtang nadakpan man ang upod ang suspetsado nga isa ka casual employee sang City Government of Silay nga si Reynaldo Dionilla, 34 anyos residente sang Purok Sampaguita, Barangay E. Lopez, Silay City.
Nakuha sa ila ang siyam ka sachet sang suspected shabu lakip man ang marked money balor P5,500 pesos, cellphones kag mga drug paraphernalia.
