Patay ang usa ka lalaki human kini gipusil sa riding in tandem bandang alas 12 kapin kun kulang ang takna kagahapon sa udto.
Biktima giilang si Bryan Ganaden y Iglupas,31 anyos, minyo residente sa purok Mauswagon sakop sa barangay Tubod ning dakbayan sa Iligan
Sa initial nga imbestigasyon sa kapulisan, adunay kalalis ang nasangpit nga biktima, unya samtang sakay sya sa usa ka sikad sa may Celdran village, sakop sa brgy. Tubod ning dakbayan sa Iligan kalit lang kini nga gipusil sa wala mailang suspetsado nga angkas sa usa ka motorsiklo ug misibat sa direksyon sa Camague.
Igo sa tangkogo ug dughan ang naangkon sa biktima hinungdan sa iyang hinanali nga kamatayon.
Narekober sa crime scene ang duha ka basiyo sa .45 nga pistola, ug usa ka sachet sa gituohang shabu.
Ang patayng lawas sa biktima anaa gihaya sa Mary venus funeral parlor sa may Barangay Acmac sakop ning syudad.
Padayon ang imbestigasyon sa kapulisan sa motibo sa maong panghitabo ug kinsa ang anaa likod sa pagpamusil patay.
