Pilason ang isa ka lalaki matapos ginlabu sang magtambag sa inaway sang mag-ulutod sa Sitio Ali, Barangay Malublob, Leon, Iloilo.
Ginkilala ang biktima nga si John Cabigunay, 47 anyos samtang ang suspek amo naman si Ebet Cabalhin, 40 anyos , lunsay pumuluyo sang nasambit nga lugar.
Ginpahayag ni Police Lt. Sotero Paguntalan Jr., hepe sang Leon PNP nga naga-inum-inum ang suspek nga si Cabalhin kag mga kauturan sini sang mag-ilinaway sila.
Ginpahayag nga nagpalapit ang biktima nga si Cabigunay agud magtambag apang naigo ini kabangdanan nga nag-intra man ini sa away sang mag-ulutod.
Bangud sini, nagkuha sang binangon si Cabalhin kag ginlabu ang biktima nga nakaagum sang pilas sa magtimbang nga kamot kag sa nawala nga abaga.
Wala man sang plano magpasaka sang kaso ang biktima batuk sa suspek kag sa baylo luyag sini nga mag-areglohanay sa balayran sa ospital.
