Sa pakighinabi sa DXDC RMN Davao kang Police Lieutenant Colonel Pablito Odias, Officer-In-Charge sa Monkayo Municipal Police Station, iyang giila ang suspek nga si Raymon Igsaolino, 25 anyos, kargador og kahoy nga taga Purok 8, Barangay Salvacion, Monkayo.
Gisaysay sa pulis nga subay sa pamahayag sa suspect, naipit kini sa kwarta aron ibayad sa iyang motor ug kwarta nga mauli para sa iyang pamilya maong nahimo niya ang pagpanulis, diin kapin kun kulang P5,000 ang iyang nakuha sa tindera nga si Myrna Sator, 68 anyos.
Apan giklaro sa suspect nga cellphone lamang ang iyang gihawiran sa kilid ug wala siyay hinagiban nga giti-on sa tindera atol sa insidente.
“Basta intensyon niya nga makabayad sa iyang utang. Iyaha man gyud intaw’ng gibayad sa iyang utang (sa motor) ang iyang nakuha nga kwarta. Unya right after nga medyo nahadlok siguro siya, mi-surrender siya,” sulti ni Odias.
Dugang sa pulis nga human nga mitahan sa otoridad ang suspect sa susamang adlaw nga nahitabo ang insidente, nangayo ra usab kini og pasaylo ug gipasaylo usab sa tindera nga dili na muduso og kaso.
RadyoMaN Kirby Manzon
