Lalaki patay human gitigbas sa silingan sa Polomolok, South Cotabato

30

Polomolok, South Cotabato–Patay ang usa ka mag-uuma human kining gitigbas sa iyang silingan sa may Purok Kaunlaran, Barangay Upper Klinan, Polomolok, South Cotabato.
Giila ang biktima nga si Jesus Delfin Serdeña Jr. , 38y/o, residente sa maong lugar. Samtang ang suspek giilang si Olegario Humpay Hitosa alyas “Boy”, 45 –anyos , minyo, empleyado sa Polo Samahang Nayon Coop ug residente sa Purok Kaunlaran, Upper Klinan, Polomolok, South Cotabato.
Subay sa inisyal nga imbestigasyon sa Polomolok PNP, nasayran nga ayha ang insidente, niagi ang biktima sa balay sa suspek aron mopalit unta ug sigarilyo sa tindahan, apan naatlan nga anaa ang suspetsado. Niadtong higayuna naglalis ang biktima ug ang suspek nga misangko sa init nga argumento, didto na mikuha ug lagaraw ang suspek dayon gitigbas ang biktima.
Nakasyagit pa ang biktima aron mangayo ug tabang sa iyang igsuon nga si Jener Delfin Serdeña apan uwahi na ang tanan tungod natigbasan na sa suspek ang iyang igsuon. Samad sa ulo ug kamot ang naangkon sa biktima nga hinungdan sa iyang kamatayon. Paspas nga misibat ang suspek human sa pagpanigbas apan nasikop gihapon kini atol sa gihimong hot pursuit operation sa kapulisan.
Nakuha sa posisyon sa suspek ang lagaraw nga gigamit niini sa pagpatay sa biktima. Sa karon gi-andam na sa kapulisan ang kasong ipasang-at batok sa suspetsadong nabalhog na sa silda sa Polomolok PNP.

Facebook Comments