Palo, LEYTE – Ginpamumusil han usa nga pulis an sarakyan kun diin nagresulta hin pagkamatay han driver han nasabi nga behikulo kanina han alas 3:10 han aga ha National Highway han Brgy. Guindapunan, Palo, Leyte.
Sumala han report, ginkilala an suspek nga hi PO3. Jeffy Parot, 33 anyos, usa nga myembro han Philippine National Police (PNP) nga naka-assign ha R2 han Police Regional Office 8 ha Camp Kangleon ha Palo.
Ginkilala naman an biktima nga hi Keneth Barbasa, 25 anyos, residente ha Brgy. Guindapunan ha nasabi nga bungto.
Ha nagawas nga inisyal nga imbistigasyon han Palo PNP, ginbabaybay ni PO3. Parot an kakalsadahan tipauli ha ira balay sakay hiya han iya single nga motor upod an duha nga backrider nga ginkilala nga hi Ryan Olindan ngan Joseph Madiao han tigda nala naigo an ira motor han mitsubishi nga sarakyan nga color gray ngan waray plate number.
Nagkaada hin komprontasyon kun diin nagpakilala hi PO3 Parot nga hiya in usa nga pulis ngan karuyag daw niya nga masettled an nahinabo nga aksidente pero an biktima in bumaton daw ha visayan dialect ngan tigda nga ginpaharurot pahirayo sakay an iya sarakyan.
Bumunot hin pusil an pulis ngan ginpabuthan an sarakyan han biktima ngan ini in nagcrash ha ligid han kalsada nga nagresulta han pagkamatay han biktima.
Gingamit han pulis nga pusil an PNP Issued Firearm Glock 17.
Gindara na ha Palo Police Station an suspek.
Ha interview han RMN kan PCInsp. Joselito Villas, Chief Of Police han Palo, Leyte, posible pasakahan an suspek hin kaso nga murder o di ngani homicide.
