Patay nang nakaplagan ang usa ka lalaki sa fish port diha sa Barangay Kimaya, Jasaan, Misamis Oriental kagahapon adlawa.
Ang maong biktima naila nga si Rogelio Calibay Pedrano, gibana-banang anaa sa 65-68 ang edad, menyo og residente sa nasangpit nga dapit.
Matud sa usa ka Romeo Salvo, 64 anyos, tag-iya sa payag nga gipuy-an sa biktima nga iya nalang nakit-ang patay si Pedrano busa nagpakitabang gilayon kini sa iyang mga silingan og gidala ang biktima sa Jasaan Hospital.
Nagtoo si Salvo nga adunay gibati nga sakit ang biktima sa wala pa kini namatay.
Sa pag-examine ni Dra. Stephanie Ann Marie Ermac sa patayng lawas sa biktima walay nakita nga samad o injuriy sa lawas niini ug sa inisyal nga finding gikabutyag sa maong doktor nga posibleng cardiac arrest ang hinungdan sa kamatayaon sa biktima.
Samtang, gitambagan sa mga police nga mi-responde ang pamilya sa biktima nga mahimong ipa-autopsy ang patayng lawas sa biktima kung aduna silay pagduda.
Sa pagkuha ning balita ang patayng lawas sa biktima ang gipahilona na diha sa Quilisadio Funeral sa Brgy. Luz Banzon, Jasaan , Misamis Oriental.
