Davao City – Mireklamo sa Sta. Ana PNP ang duha ka lalaki human nga gikawatan sa managlaing insidente.
Sa report gikan Sta. Ana PNP, unang nabiktima alas 10:00 sa buntag mao si Jelmar Sesico, 26 anyos, nagpuyo sa may Brgy. 23-C ning siyudad human nga gikuot matud pa ang iyang pitaka nga dunay sulod nga importanteng IDs ug salapi nga mukantidad sa 700 pesos.
Matud pa nga samtang nagsakay og jeep ang biktima ug minaug sa may Brgy. Ubalde Agdao, iya nalang nadiskobrehan nga abri na ang zipper sa iyang bag diin gituohan niini nga gihinayhinay og kuot ang iyang pitaka.
Samtang laing nabiktima sa kawat mao ang Indian National nga si Meeramydeen Sheikwood, 19 anyos, nagpuyo sa Juan Luna St. siyudad sa Davao.
Sumala pa nga alas 8 sa buntag, iya nalang nadiskobrehan nga nahanaw na ang iyang pitaka nga nabilin sulod sa lawak lakip nahanaw ang ang iyang certificate of registration ID ug cash nga mukantidad og 3,000 pesos.
Igo nalang sa pagpatala ang mga biktima sa buhatan sa Sta. Ana PNP aron imbestigahan ang subling pagsiaw sa pagpangawat.
RadyoMaN Don Pulayao
