Sa impormasyong gipadala sa DXDC RMN Davao ni Police Lieutenant Colonel Jeffrey Latayada, ang Chief of Police sa Tagum City PNP, niadtong February 2, 2024, mi-report ang babayeng si Mary Joy Daculan sa ilang buhatan human giingong gidunggab ang iyang higala nga giilang si Justin Amora.
Sa inisyal nga imbestigasyon, nag-uban ang maghigalang si Amora ug si Dacula gikan sa usa ka club sa Tagum diin mihanyag ang suspect sa babayeng si Dacula nga pasakyon siya sa iyang motor apan nagdumili kini ug didto miuban sa biktima.
Wala damhang sa ilang paglarga, mi-overtake si Grande, giharangan ang kalsada ug gisumbag ang biktima. Nisuway pa og dagan si Amora apan gigukod ug gidunggab kini sa lalaki.
Nakahiagom ang biktima og daghang dinunggaban sa kalawasan ug gilayong gidala sa Davao Regional Medical Center (DRMC) kinsa nagpaalim na karon sa iyang mga samad.
RadyoMaN Ivy Parido
