Davao City – Natata ang ilong sa usa ka lalake kinsa gikulata sa construction worker gumikan kay wala magustohi ang kanta niini tungod matud pa sa kayabag sa tingog.
Pirting gubaa sa ilong ni Precardo Depesta, 24 anyos nga nagpuyo sa Golden Hills, Panacan ning siyudad human kulataha sa silingan nga si Gilbert Lambayan, ug 22 anyos.
Gisulod matud pa sa suspek sa balay ang biktima ug didto gidabu-dabuhan og kulata puntarya ang ilong human kini nayabagan sa tingog ni Depesta kinsa naglunang sa kalipay sa pagkanta alas-10:30 sa kagabhion.
Yano ra sab migawas sa panimay sa biktima ang suspek ug dayon milahos og pa-uli sa ilang pinuy-anan.
Gumikan sa mga bun-og, nakasuka si Depesta samtang gidala sa Southern Philippines Medical Center aron matambalan ang wala na ma-itsura nga ilong.
Ang Sasa Pnp gilayon nag-dispatch sa Mobile #91 sa pagpanguna ni PO1 Baylosis sa nahitaboan aron dakpon ang construction worker kinsa napaslak na sa selda sa presinto 5.
Kasong physical injury ang ipasang-at batok sa dinakpan sa buhatan sa piskalya karong adlawa.
RadyoMaN Joel Viray
